رسالة الى صُناع السلام

..قبل كم سنة تعرفت على شاب بالصدفة طلع يشتغل بيوم السلام،  من دا يحجيلي على نفسة عرفت اني ويا عدنا نفس الاهداف بس كل واحد بينا ماخذ طريق يختلف

المهم دعاني اشارك بيوم السلام رغم الانتقادات الي جنت اوجهها ، بس حبيت الفكرة الهدف واحد و قررت اشارك
رحت دا اشوف جان دوري عبارة عن “مسفط و كاعد” بحجة اراقب و محد ينطيني اي دور اسوي و اني جنت فرحان بهل الشي

و همزين جان هذا دوري لان شفت شي مجنت متوقعة راح اشوفة

شفت حلمي بس بصورة مصغره

شفت العالم يجمع كل الطوائف بهدف واحد هو النجاح و التطور 

كل فرد ينفذ دوره و يساعد العناصر الضعيفة حتى تبقى سلسلة العمل الجماعي قوية
شفت العناصر السيئة متنهمل،  لا يساعدوها تصحح اغلاطها
اشخاص ميعرفون اليأس  و ماكو اي تحدي يوكف كدامهم
و هاي كلها دا يقدمون هدية بسيطة بدون اي مقابل و يرسمون لوحة لحلمهم، عالم بي كل الالوان و الاحمر يمثل الورد مو الدم عالم بعيد عن العنف
يمكن كـ شخص و طبيعة البشر كرهت اشخاص بيهم بس بصورة عامة عشقتهم عشقت هل العائلة الي صنعوها
و الاحلى ما بالموضوع عيني انفتحت على مجال جديد جنت مشايفة عرفت اكو اكثر من هاي المجموعة  يحاولون يسون نفس الشي بطرق مختلفة
و مو بس مجموعات اكو اشخاص فردين دا يحاولون يحاربون بطريقتهم

..اتمنى الكل يبقون على المسار مالتهم لان دورهم مهم و لازم كلنا نسويلنا دور بهذا المجتمع حتى نكمل رسم الحلم و نبني العالم الي نريدة

بقلم : كرار كيتاوي